آنه ماكولن خطيه اعله الشموع

آنه ماكولن خطيه اعله الشموع
الذوباهه النام وسط احضانهه
احسد اصخور الجرف لو فتهه روج
لن شــــــــــــــــــفايفهن لثم شِــــــــــــيطانهه
الفخر مو للطش بذر وانطاه دماه
الفخر للبذرة التمد اغصــــــــــــــــــــانهه
ولا يغرك زمر طكََََََـ صيده ورماه
عاين البالذل رخت جنحانهه
وعاين الجدم المشت فوكَـ التراب
رضت بغباره الشبكَـ سيكَانهه
انطيني واحد يسوه افديله الحياة
لن چثيرة الطلكَت جثمانهه
چم سفينه العاركت روج المحيط
وتالي يرجع صيتهه لسفانهه
والسواري ادكَـ جدم لاجل الشراع
والشرع تتفاخر بالوانهه
خلي ميزانك عكَل والبخت چيل
ولا تِبخَّسْ الناس من اوزانهه
الشمع نَس ابلحظة الخيطة چواه
وعاف لخيوط لحَرِكَـ نيرانهه
ياهو باع الوفه وياهو اللي اشتراه
والفصول اطالب ابعنوانهه
آنه احچيلك صور وانته التصوغ
والقوافي تريد ضبط اوزانهه
آنه عرفك صايغ وتفرز شكَول
والعروس بشاربك نيشانهه
وانه اعرفك ريح لو مر بالسبوس
يلكَط الحنطة ويبين ادنانهه
الجملة ما تهوى الطلاسم والحروف
الماتنقطهه تشل السانهه
اكو سطحي الماي يدهده عليه
لاچن اشحده يعلي ايشانهه
آنه جبَّلت الحچي وهلت التراب
وانته حط شاهدهه يا دفانهه
وانته حط شاهدهه يا دفانهه